Manchester Metrolink

Metrolink o Manchester Metrolink esas sistemo di tramvoyo/lejera fervoyo en Granda Manchester, Anglia.

La sistemo proprietesas da Transport for Greater Manchester (TfGM) ed operacesas e mantenesas sub kontrato da Keolis/Amey.  37,8 milion pasajero-voyaji eventis per la sistemo dum 2016/17.

La reto konsistas ek sep linei qui radias del urbo-centro di Manchester a termini en Altrincham, Ashton-under-Lyne, Bury, East Didsbury, Eccles, Manchester-Aeroportuo e Rochdale.  Metrolink havas 93 etapeyi alonge 92 km de voyo, pro quo ol esas la maxim granda sistemo di lejera fervoyo en la Unionita Rejio.  Ol konsistas ek mixuro de surstrada reli inter altra trafiko; rezervita voyo-segmenti, segregacita de altra trafiko, e konvertita olima fervoyo-linei.  Ol operacesas da floto de vehili Bombardier Flexity Swift M5000.

Sistemo di lejera fervoyo por Granda Manchester emersis de la falio di la tunelo-skemo 1970s Picc-Vic en la 1970a yari obtenar financizo de centrala guvernerio.  Skemo di lejera fervoyo propozesis en 1982 kom la minim chera fervoyala transporto-solvo por centrala Manchester e la cirkondanta metropolo Granda Manchester.  Guvernerial aprobo grantesis en 1988 e la reto komencis operacar servi inter Bury Interchange e Victoria ye 6ma aprilo 1992, tale diveninte l'unesma moderna surstrada fervoyo-sistemo en la Unionita Rejio (la Blackpool-tramvoyo di 1885 esis la unika unesma-generaciona tram-sistemo en la UR qua transvivis til la kreo di Metrolink).

Expanso di Metrolink esas klef-strategio di transporto-projetisti en Granda Manchester, qui surveyis olua developeso en sucedinta projeti, konocata kom Fazi 1, 2, 3a e 3b, e la maxim recenta fazo, 2CC diveninta operacala en februaro 2017.  Konstrukto-laboro che la Trafford Park Line Extension de Pomona a la Trafford Centre komencis en frua 2017 kun evaluita komenco-dato 2020/21.  Pluse, TfGM aprobis plu spekulala expanso-propozi por nova linei a Stockport, slingo cirkum Wythenshawe, ed adjunto di tram-treno-teknologio.